ალასანია: ხალხი ხვდება, რომ პოლიტიკოსები, რომლებიც სხვისი უკანალის თვალიერებაში ატარებენ ცხოვრებას, ვერ შექმნიან ჯანსაღ გარემოს

პირადი ცხოვრების ამსახველ კადრებთან დაკავშირებით, მმართველი გუნდის წევრების მიერ, ბოლო დროს გაკეთებულ განცხადებებს „თავისუფალი დემოკრატების“ ლიდერი ირაკლი ალასანია სოციალურ ქსელში გამოეხმაურა.

როგორც იგი აცხადებს, პოლიტიკოსების ნაწილი მზადაა, მორალური ტერორით ადამიანების თვითმკვლელობამდე მიყვანა სცადონ.

„პოლიტიკაში ბოლო დროს მომრავლებული “მორალისტები”, რომლებიც გულგრილობას და უუნარობას იჩენენ ქვეყნის წინაშე არსებული ეკონომიკური, სამართლებრივი და სხვა კრიზისების მიმართ, არ და ვერ არიან დაკავებული საგარეო საფრთხეების აღქმითა და მოგვარებით, მაგრამ ყოველ წამს მზად არიან მორალური ტერორით ადამიანების თვითმკვლელობამდე მიყვანა სცადონ, ვერც ხვდებიან, ნებისმიერი ადამიანის პირად ურთიერთობასთან ან კრიზისთან შედარებით, რამდენად შეუდარებლად ავადმყოფურია მათი ქმედება და აზროვნება.

სამაგიეროდ და საბედნიეროდ, ხალხი ხვდება, რომ პოლიტიკოსები, რომლებიც სივრცეში ყურების და მასშტაბში აზროვნების ნაცვლად სხვისი უკანალის თვალიერებაში ატარებენ ცხოვრებას, ვერ შექმნიან ჯანსაღ გარემოს. მათ კარგა ხანია, თვითონ განუსაზღვრეს საკუთარ თავებს, აზრებს და თვალებს ადგილი – კლოაკაში.

შანტაჟისა და ტერორის შესაძლო მსხვერპლთ კი მინდა შევახსენო – ტერორისტებთან და შანტაჟისტებთან მოლაპარაკებაზე არ მიდიან. ეს მსოფლიო ანტიტერორისტული პრაქტიკის აქსიომაა“, – წერს ალასანია.

Comments
Loading...