ბატონმა თოფაძემ ილაპარაკა როგორც რუსეთუმემ და სტალინისტმა – ლევან ბერძენიშვილი

“ბატონმა თოფაძემ ილაპარაკა როგორც რუსეთუმემ და სტალინისტმა”

საქართველოს პრემიერ-მინისტრი გიორგი კვირიკაშვილი ხურჩაში მომხდარ მკვლელობაზე პასუხისმგებლობას ოკუპანტ ქვეყანას, რუსეთს აკისრებს. მისი განცხადებით, ხურჩაში მოხდა სასტიკი მკვლელობა და ეს იყო სასტიკი ძალადობა.

“რა საკვირველია ამაზე პასუხისმგებლობა ეკისრება ოკუპანტ ქვეყანას, რუსეთს. ჩვენ საერთაშორისო თანამეგობრობის ყურადღება მივიპყარით და გაკეთდა მთელი რიგი განცხადებები”.

საოკუპაციო ხაზთან მომხდარ მკვლელობას, “ერთი კაცის სიკვდილი” უწოდა “მრეწველების” ლიდერმა გოგი თოფაძემ. მისი თქმით, “ეს ერთი შემთხვევა არ უნდა იყოს პოლიტიზირებული. ყველგან ხდება ასეთი რამე”.

შერიგებისა და სამოქალაქო თანასწორობის საკითხებში სახელმწიფო მინისტრმა პაატა ზაქარეიშვილმა კი, მომხდარ მკვლელობასთან დაკავშირებით გაკეთებული თავისი პირველი განცხადების გამო ბოდიში მოიხადა. კერძოდ, პაატა ზაქარეიშვილმა ხურჩაში გიგა ოთხოზორიას მკვლელობის ფაქტზე პირველი კომენტარი 21 მაისს გააკეთა. მისი განცხადებით, ამ ხელისუფლების პერიოდში “ეს პირველი ასეთი მსხვერპლია, რაც ეჭვქვეშ აყენებს სამშვიდობო პოლიტიკას, თუმცა ჩვენ სამშვიდობო პოლიტიკას არავითარ შემთხვევაში არ გადავუხვევთ”.

მოგვიანებით ზაქარეიშვილმა განაცხადა, რომ მისი სიტყვები იყო არასწორი და წინდაუხედავი.
“ხურჩაში რაც მოხდა ეს არის საშინელი მკვლელობა. ნებისმიერი სახელმწიფო მოხელე, მაღალი თანამდებობის პირი, რომელიც მეც ვარ, მეტი ყურადღებით უნდა აკვირდებოდეს თავის სიტყვებს. რაც მე ვარ სახელმწიფო მინისტრი პირველად მაქვს განცდა სინანულის, რომ ჩემი სიტყვები არა თუ სწორად არ იყო გაგონილი, არამედ არასწორად იყო ნათქვამი. მინდა სინანული გამოვხატო გიგა ოთხოზორიას ოჯახის მიმართ, რომელმაც ჩემი სიტყვები მტკივნეულად აღიქვა”.

“რესპუბლიკური პარტიის” წევრთან, დეპუტატ ლევან ბერძენიშვილთან საუბარი ხურჩაში მომხდარი მკვლელობის შესახებ დავიწყეთ.

– სინამდვილეში პაატა ზაქარეიშვილს არაფერი ჰქონდა საბოდიშო. მას არავისთვის შეურაცხყოფა არ მიუყენებია, უბრალოდ, მის ნათქვამს ფორმა შეუცვალეს. რაც შეეხება ბატონ თოფაძეს, თუკი ვინმე განსხვავებას ვერ ხედავს ზაქარეიშვილისა და თოფაძის განცხადებებში, მაშინ საქმე გვაქვს ინტელექტის პრობლემასთან. პაატა ზაქარეიშვილმა ილაპარაკა როგორც ქართველმა პატრიოტმა, ბატონმა თოფაძემ კი ილაპარაკა როგორც რუსეთუმემ, სტალინისტმა და არა როგორც სერიოზულმა პოლიტიკურმა ფიგურამ. მე ვხედავ განსხვავებას, ვინც ვერ ხედავს, ღმერთმა ხელი მოუმართოს, ეს ქვეყანა ყველასთვის არის, როგორც რუსთაველმა თქვა, ვარდთა და ნეხვთა მზე ერთნაირად მოეფინება, ასე რომ, აქ პრობლემა არ არის.

რაც შეეხება ხელისუფლების პოზიციას, ის კაცი უნდა ვიპოვოთ და დავსაჯოთ. ამისთვის უნდა იმუშაოს როგორც საქართველოსა და დე-ფაქტო აფხაზეთის ხელისუფლებამ, ისე საერთაშორისო თანამეგობრობამ. კაცის მოკვლა სათამაშო ამბავი არ არის. არავის არ უნდა შერჩეს ეს ამბავი, ჩვენი ურთიერთობა როგორი იქნება მეზობელთან ეს ერთი საკითხია, მაგრამ მკვლელობას პასუხი უნდა გაეცეს.

კორცხელში მომხდარი დაპირისპირება ხომ არ არის ერთგვარი წინასაარჩევნო რეპეტიცია, თქვენი აზრით, ვითარება კიდევ უფრო გამწვავდება?
– თუ ამ საქმეზე არ დაიწყება გამოძიება და თუ დამნაშავეები არ დაისჯებიან, მაშინ ეს მიიღებს უფრო მასშტაბურ ხასიათს. ჩვენ ვამბობთ, რომ საქმე უნდა გამოიძიონ, წინააღმდეგ შემთხვევაში მივიღებთ უფრო ცუდ სიტუაციას.

– “რესპუბლიკელები” არიან საარჩევნო სისტემის გერმანული მოდელის ინიციატორები, თქვენი ოპონენტების განცხადებით, პარტიას თავის დროზე უნდა გახსენებოდა საარჩევნო სისტემის ცვლილებები….
– აქამდე გვეგონა, რომ უმრავლესობა თავის სიტყვას არ უღალატებდა და საკონსტიტუციოდ შევცვლიდით საარჩევნო კანონს. საქართველოს პარლამენტში აღძრული იყო 2 საკონსტიტუციო ცვლილება, ერთი დააყენა უმცირესობამ, მეორე უმრავლესობამ, როცა გაირკვა, რომ ორივეს ფეხებზე ჰკიდია საკუთარი ინიციატივა, მხოლოდ ამის შემდეგ “რესპუბლიკურმა პარტიამ”, როგორც გამოსავალი, შევთავაზეთ გერმანული მოდელი. აქამდე გვეგონა, რომ უმრავლესობასთან ერთად შევცვლიდით სისტემას, მაგრამ უმრავლესობამ არ ისურვა ცვლილებები… უმრავლესობას არც გერმანული მოდელი უნდა, არც საკონსტიტუციო ცვლილება… არც უმცირესობას და მეტიც, არც საკუთარ თავს ეთანხმებიან.

– მას შემდეგ, რაც პარლამენტში “რესპუბლიკური პარტია” ოპონირების აქტიურ ფაზაში გადავიდა, ჩნდება კითხვები თუ რას აპირებენ “რესპუბლიკელი” მინისტრები. პრემიერ-მინისტრის განცხადებით, მას შერჩეული ჰყავს მათი შემცვლელები, ნოდარ ჯავახიშვილის თქმით კი, “როდესაც კოალიციიდან გადიხარ, მორალურად ასეა, თანამდებობიდანაც უნდა გადადგე”, რჩებიან თუ არა თანამდებობაზე “რესპუბლიკელი” მინისტრები?
– ბატონმა ჯავახიშვილმა ეტყობა ჯერ არ იცის, რომ ჩვენ კოალიციიდან არ გავსულვართ. ჯერ-ჯერობით უმრავლესობაში ვართ. თუ ეს ვინმემ არ იცის, ძალიან საწყენია, ნამდვილად ვიცი, რომ გადაწყვეტილება მივიღეთ ასეთი – არჩევნებში გავდივართ ცალკე, კოალიციიდან გასვლაზე კი გადაწყვეტილება არ მიგვიღია. კოალიციიდან მაშინ გავალთ, როცა ამას საჭიროდ ჩავთვლით. მინისტრებიც მაშინ დატოვებენ თანამდებობებს, როდესაც ან პარტია ჩათვლის საჭიროდ, ან თავად მინისტრები, ან პრემიერ-მინისტრი გადააყენებს. ჯავახიშვილმა ის ფაქტი არ იცის, რომ კოალიციიდან “რესპუბლიკური პარტია” ჯერჯერობით გასული არ არის და გვეუბნებიან, რომ გახვალ ასე უნდა მოიქცეო, რომ გავალთ მასეც მოვიქცევით. ნოდარ ჯავახიშვილის აზრი არ გვაინტერესებს, ჩვენ გვაინტერესებს პრემიერის აზრი. რაც შეეხება იმას, რომ პარლამენტში ჩვენ გადავედით თანამშრომლობისა და კრიტიკის რეჟიმზე, ამის შესახებ 27 მარტს გამოვაცხადეთ.

კვირის პალიტრა

Comments
Loading...