გიგა რომ წასულიყო ხელისუფლებიდან, დღეს სააკაშვილის მხარდამჭერი არ ვიქნებოდი – თეა თუთბერიძე

უფლებადამცველი თეა თუთბერიძე მოვლენათა შესაძლო განვითარების ისეთ ვერსიაზე წერს, რა შემთხვევაშიც, შესაძლოა, ის ექს-პრეზიდენტ მიხეილ სააკაშვილის მხარდამჭერი არც ყოფილიყო.

თუთბერიძეს გული წყდება, რომ ადამიანებმა, რომლებისგანაც დემოკრატია და სიტყვის თავისუფლების დასაცავად ბრძოლა ისწავლა, იმედები გაუცრუეს.

“2008 ან 2009 წელს მაინც, გიგა რომ წასულიყო სააკაშვილის ხელისუფლებიდან, შეექმნა ახალი ლიბერალური ღირებულებების პროდასავლური კარგი პარტია (რისი რესურსიც მას გააჩნდა), ამდგარიყო და დაეწყო კრიტიკა სააკაშვილის ხელისუფლების, დაწყებული რეფორმების შეჩერების და ფასადურ რეფორმებად ქცევიდან, დამთავრებული სასამართლო ხელისუფლების კონტროლით და მოეთხოვა რეფორმების გაგრძელება, სასამართლოს რეალური დამოუკიდებლობა, მედიის თავისუფლება და უამრავი სხვა რამ, რაც სასიცოცხლოდ მნიშვნელოვანი იყო ახალგაზრდა სახელმწიფოს მშენებლობისთვის იმ გზაზე, მე დღეს მიხეილ სააკაშვილის მხარდამჭერი არ ვიქნებოდი”, – წერს თუთბერიძე “ფეისბუქის” პირად გვერდზე.

მისი თქმით, სავარაუდოდ, ის ნაგავიც დაიწმინდებოდა და ჩაიძირებოდა, მაშინდელ ოპოზიციაში რაც ტივტივებდა და ქვეყნის განვითარებაც გაგრძელდებოდა თანდათან.

“მაგრამ ამის ნაცვლად რა გზა აირჩია? სამწუხაროდ ძალიან არასწორი და დამაზიანებელი როგორც საკუთარი თავისთვის და პოლიტიკური კარიერისთვის, ასევე ქვეყნისთვის (გაცნობიერებულად მოხდა ეს, თუ გაუცნობიერებლად, ეს ასეა რეალურად ისევ და ისევ სამწუხაროდ).

მეგობრებო, თუ თვლიდით, რომ მიშა დიქტატორად იქცა, აღარ გისმენდათ, თქვენ მოსაზრებებს აღარ იზიარებდა და ა.შ., ამდგარიყავით და დაგეწყოთ პოლიტიკურად სწორი გზით ბრძოლა და არა ზურგს უკან სამარის გათხრა, მისი მოშორებისთვის ბრძოლა ფარულად, ჭორების გავრცელების ხელშეწყობა, თუ გავრცელება, მოსმენები და მისი საუბრების ჩანაწერების გამოგდება-გავრცელება (2010 წლის იმიტირებული ქრონიკის ამბავზე ერთ-ერთი მაგალითად, სააკაშვილი-არველაძის, ასევე არველაძე-წამალაშვილის სატელეფონო საუბრები) და ათასი საზიზღრობა, იმ ადამიანებზე, ვინც მისი ბოლომდე ერთგული რჩებოდა.

თუნდაც ის, რომ თურმე ახალაიამ სპეცრაზმელები აწამა და მერე მიწაში ჩამარხა და ა.შ. და ა.შ. ამ ჭორების პარტიის შიგნით თუ გარეთ გავრცელება (რა ნაწამები, მკვდრები და ჩამარხულებიც იყვნენ ის სპეცრაზმელები, კარგად გამოჩნდა ე.წ. წამებიდან და დამარხვიდან 2 დღეში ანტალიაში გადაღებულ ფოტოებზე და სასამართლოზე კიდევ).

რაში გჭირდებოდათ მეგობრებო ეს ყველაფერი, ან დღეს რასაც აკეთებთ ეგ რაში გჭირდებათ, ვის ებრძვით, რას ებრძვით, პუტინის ოლიგარქის არაფორმალური მმართველობის გადამკიდე მიშასთან ბრძოლა გაგიხდათ პრიორიტეტი? ძალიან სირცხვილია მეგობრებო, ძალიან ტეხავს. მსგავს რამეს ვერასოდეს წარმოვიდგენდი თქვენგან. ვერც იმას ვერასოდეს წარმოვიდვენდი ზურგსუკან კი არა, რასაც დღეს ღიად და დაუფარავად ჩადიხართ უკვე.

მე თქვენგან ვსწავლობდი, თქვენთან ურთიერთობის პერიოდმა ჩამომიყალიბა სწორი ღირებულებები და პრინციპები მნიშვნელოვანი თემების ირგვლივ, თქვენგან ვწავლობდი დემოკრატიის, სიტყვის და გამოხატვის თავისუფლებისთვის, ლიბერალური ღირებულებების დანერგვისთვის ბრძოლას და უამრავ რამეს. ზოგჯერ ძალიან მიჭირს დავწერო რამე, ზოგჯერ თავს ვიკავებ, ზოგჯერ ვეღარც ვიკავებ და საშინლად მოქმედებს ეს ყველაფერი რასაც დღეს ვუყურებ.

უჭკუოები რომ ყოფილიყავით და გაუნათლებლები ქართული პოლიტიკური სპექტრის უდიდესი ნაწილის მსგავსად, მაშინ არც გასაკვირი იქნებოდა და არც გულდასაწყვეტი, მაგრამ რომ არ ხართ (ზოგიერთი გამონაკლისის გარდა), სწორედ ეგაა მიზეზი, რომ ვერ გპატიობთ ამ ყველაფერს, მაშინ როცა შეიძლებოდა ყველაფერი აბსოლუტურად სხვაგვარად ყოფილიყო!”, – წერს თეა თუთბერიძე.
“ნაციონალურ მოძრაობაში” აზრთა სხვაობა 2016 წლის საპარლამენტო არჩევნების მეორე ტურში მონაწილეობასა და პარლამენტში შესვლა-არშესვლიდან დაიწყო. “ნაციონალური მოძრაობის” ლიდერების ნაწილი, 20 იანვარს დაგეგმილ მასშტაბურ ყრილობას არალეგიტიმურად აცხადებს და პროცესს ემიჯნება. ორადაა გაყოფილი რაიონული და საქალაქო ორგანიზაციებიც. ბოკერიას ფრთა თანაპარტიელებს ცილისმწამებლური კამპანიის აგორებაში ადანაშაულებს და ხაზს უსვამს, რომ ყრილობის საორგანიზაციო კომისია პოლიტსაბჭოს წესების დარღვევით მოქმედებს, თუმცა საპირისპიროს ამტკიცებს და საბოტაჟის მცდელობაზე საუბრობს მიხეილ სააკაშვილის გუნდი, რომელსაც, ნიკა მელიაც შეუერთდა. ყოფილი პრეზიდენტის მხარდამჭერები 7 000-კაციანი ყრილობისთვის მზადებას განაგრძობენ და დელეგატებსაც არჩევენ.