ამერიკის შეერთებული შტატების სახელმწიფო მდივანი ჯონ კერი ქვეყნის არჩეულ პრეზიდენტ დონალდ ტრამპს მოუწოდებს, რუსეთის წინააღმდეგ დაწესებული სანქციები არ გააუქმოს.
აღნიშნული განცხადება შეერთებული შტატების სახელმწიფო მდივანმა პოსტის დატოვებამდე, ერთ-ერთ ბოლო ინტერვიუში გააკეთა.
ტელეკომპანია NBC-ის ჟურნალისტთან საუბრის დროს ჯონ კერიმ აღნიშნა, რომ მსგავსი გადაწყვეტილება უდიდესი შეცდომა იქნება, რომლითაც არჩეული პრეზიდენტი ვაშინგტონის ინტერესებს დიდ ზიანს მიაყენებს.
აშშ-ს სახელმწიფო მდივანმა რუსეთის ქმედებებს ყოვლად მიუღებელი და სახიფათო უწოდა.
ბარაკ ობამას ადმინისტრაციამ საარჩევნო პერიოდში განხორციელებული კიბერთავდასხმების გამო, რუსეთს დამატებითი სანქციები დეკემბრის ბოლოს დაუწესა.