კობახიძე: ოკუპირებულ აფხაზეთში ჩატარებულ ე.წ. არჩევნებს ვერავითარ შემთხვევაში, ლეგიტიმურად ვერ მივიჩნევთ

პარლამენტის თავმჯდომარე ირაკლი კობახიძე მიიჩნევს, რომ ოკუპირებულ აფხაზეთში ჩატარებული ე.წ. საპარლამენტო არჩევნები საერთაშორისო სამართლის პრინციპებს ეწინააღმდეგება.

„ჩვენ ვერავითარ შემთხვევაში, ვერავითარი ფორმით ვერ მივიჩნევთ ამ არჩევნებს ლეგიტიმურად“, – ასე ეხმაურება ბერლინში ვიზიტით მყოფი საქართველოს პარლამენტის თავმჯდომარე ოკუპირებულ აფხაზეთში ჩატარებულ ე.წ. საპარლამენტო არჩევნებს.

„ჩვენ ვმოქმედებთ საერთაშორისო სამართლის პრინციპების შესაბამისად. საერთაშორისო სამართლის პრინციპებს და ნორმებს პირდაპირ ეწინააღმდეგება ეს ე.წ. არჩევნები, რომელიც ტარდება აფხაზეთის ტერიტორიაზე.

აქედან გამომდინარე, ჩვენ ვერანაირ სამართლებრივ შეფასებას ვერ მივცემთ ამ ყველაფერს, უფრო სწორად, სამართლებრივი შეფასება არის ის, რომ ჩვენ ვერავითარ შემთხვევაში, ვერავითარი ფორმით ვერ მივიჩნევთ ამ არჩევნებს ლეგიტიმურად“, – განაცხადა ირაკლი კობახიძემ.